ادب اور فحش نگاری۔

حال ہی میں فیس بک پر ایک ادبی فورم ترتیب دیا گیا ہے جس کے اغراض و مقاصد میں ایک ہی بات درج ہے کہ یہ ادبی فورم ،ادب میں بڑھتی ہوئی فحش نگاری، واہیات گوئی اور بے ہودگی کی روک تھام کی ایک کاوش کے طور پر “صاف ستھرے“ ادب کی تخلیق کی حوصلہ افزائی کے لئے ترتیب دیا جا رہا ہے۔ اس دعویٰ کو پڑھ کر ہمیں بے اختیار بچپن میں سنی گئی “نبیوں کی کہانیاں“ میں سے ایک کہانی یاد آ گئی ، کہانی کچھ یوں ہے کہ حضرت موسیٰ علیہ السلام نے اللہ تعالی کے سامنے ضد کی کہ مجھے بھی ایک مخلوق تخلیق کرنے کی اجازت دی جائے، ہمارے تصور میں کردار و مکالمے کچھ یوں ابھرتے ہیں کہ اللہ میاں نے مسکرا کر “سوچا“ ہو گا، موسیٰ یہ تمھارے دل میں کیا سودا سما گیا، کہاں تبلیغ اور کہاں تخلیق ، لیکن پھر موسیٰ علیہ السلام کی ضد اور اپنی رحمت و ربوبیت کے ہاتھوں مجبور ہو کر ایک پرندے کی تخلیق کی اجازت دے دی، اب 

ہوا یوں کہ، موسیٰ علیہ السلام نے بال و پر بنائے، چونچ اور پاؤں وغیرہ موزوں کیے اور نقش و نگار وغیرہ سے اپنا “تخلیقی“ شوق پورا کیا لیکن جب اصل مرحلہ یعنی ضروریات و حاجات کا معاملہ آیا تو شرم گاہ بنانے کے معاملے پر آ کر رک گئے بلکے جھینپ گئے ، سارا تخلیقی “شوق“ رفو ہو گیا اور نبوت کی “مجبوریاں“ آڑے آ گئیں۔ ( بعض لوگ کہتے ہیں کہ بھول گئے، حالانکہ اگر ایسا ہوتا تو زیادہ قابل گرفت ہوتا) شرم گاہ بنانا تو دور کی بات شریعت میں تو اُس پر نظر ڈالنا اس کا تصور کرنا بھی گناہ ٹھرا ، قصہ مختصر نبی اللہ نے وہ پرندہ رفع حاجت و تناسل کی ضروریات کو پورا کرنے والے اعضاء کے بغیر ہی اڑا دیا، سُنا ہے وہ پرندہ آج تک منہ سے کھا کر منہ سے ہی اخراج بھی کرتا ہے۔ 

افادی ادب کا وجود مسلمہ ہے اور اس کی ضروریات ایک الگ موضوع ہے لیکن یہ تبلیغی لکھاری اور تبلیغی قاری کی تخلیق و قراءت کا حال بھی بس موسی علیہ السلام کے پرندے جیسا ہی ہے۔

ہمیں آج تک ایک بات سمجھ میں نہیں ائی کہ لوگ “فحش ادب“ کی اصطلاح کیسے اور کیونکر استعمال کر لیتے ہیں، بھئی ادب الگ شے ہے اور فحش نگاری الگ شے۔ ادب میں چاہے جتنا بولڈ موضوع اٹھایا جائے، چاہے جتنا تھیکا اور کھل کے لکھا جائے وہ فحش نگاری کے زمرے میں نہیں آتا کیونکہ جیسے ہی ایک تحریر فحش نگاری کے زمرے میں داخل ہوتی ہے وہ ادب کی کسی بھی قسم سےمتعلق نہیں رہتی۔

مانا کہ یہ ایک معروضی حقیقت نہیں ہے، ایک موضوعی بحث ہے اور فحاشی نگاری ہو یا “صاف ستھرا ادب“ یہ ہر شخص کے لئے ایک ذاتی نوعیت کا اور منفرد معاملہ ہے لیکن یہ بات اتنی بھی تجریدی نہیں ہے۔ ایک “فائن لائن“ سہی لیکن حد فاصل موجود ہے اور بہت واضع ہے۔ آئے دیکھتے ہیں کیسے؛

جنسی اعضاء، کے نام استعمال کرنا اور جنسی عمل کا ذکر کرنا فحش نگاری نہیں ہے نہ مذہب میں ، نہ حکمت میں، نہ قانون میں اور نہ ہی ادب میں مذہب میں جا بجا تفصیلٰا عبادات و معاملات کے احکامات میں جنسی اعضاء و اعمال کا ذکر ہے ، پستانوں کو کیسے پکڑ کر بچے کو دودھ پلانا ہے، زیر ناف طہارت و صفائی کے کیا احکامات ہیں، ہشفہ کو کیسے صاف و مطہر کرنا ہے، حتیٰ کہ دخول و خروجِ عضو اور انزال و اخراج مادہ کے مسائل پر پورے پورے ابواب ہیں لیکن کچھ بھی فحش نہیں ہے کیونکہ بیمار ذہنوں کو تشفی رہتی ہے کہ یہ مذہب کی طرف سے ہے اور اس دیگ میں جو بھی پکا ہے وہ ہلال ہے۔ طب و حکمت میں پورے پورے رسالے جنسی بیماریوں کے اسباب و علل اور جنسی اعضاء کی ساخت، ہجم اور افعال و کردار پر مشتمل ہیں لیکن قابل اعتراض نہیں ہے، قانون سے واقفیت رکھنے والے بخوبی جانتے ہیں کہ لڑای جھگڑے، قتل و اقدام قتل اور ٹریفک حادثات کی ہر پولیس رپورٹ کے ساتھ ایک "عریاں" سکیچ لگا کر جسم کے اُن حصوں کو نشان زدہ کیا جاتا ہے جو کہ متعلقہ معاملے میں متاثر ہوئے ہوں ۔ اب رہ گیا ادب اور خاص طور سے افسانہ تو جب کسی کردار کی جنسی نفسیات کا تذکرہ یا تجزیہ مقصود ہو یا کسی کہانی میں واقعات کے تسلسل یا ارتباط سے نفس مضمون یا کرداروں کی داخلی کیفیت کا بیان مطلوب ہو تو اعضاء و اعمال اور باہمی اختلاط کا ذکر ضروری بلکہ مجبوری بن جاتا ہے ۔ 

مثال کے طور پر ایک خاتون تھیں جن کا خاوند بہت تند خُو، متشدد اور بد گو تھا، وہ اپنی بیوی کے منہ پر اپنی ساس کو غلیظ گالیوں بکنے کا عادی تھا، بعض اوقات تو بات گالیوں سے آگے بڑھ جاتی اور وہ اشاروں کنایوں میں ساس کے ساتھ باقائدہ جنسی عمل کے تکمیل پذیر ہونے کا اظہار کر دیتا۔وہ بیوی کی مسکین سی ماں کے بارے میں جتنا بد زبان تھا اپنی ماں کے بارے میں اتنا ہی حساس اور جذباتی تھا۔ اُس عورت کو اپنے خاوند سے نفرت تھی لیکن خاص طور پر جب وہ اُس سے اپنی جنسی ضرورت پوری کرتا تو وہ اذیت و کراہت محسوس کرتی۔ بیوی بہت بے بس تھی کچھ اپنے میکے کے پس ماندہ ماحول کی وجہ سے اور کچھ اپنی بزدل طبیعت کی وجہ سے( ویسے تہذیبی تربیت کے اثرات سے ہماری اکثر خواتین اسی طرح “بے بس“ ہی ہوتی ہیں۔) وہ بہت عرصہ برداشت کرتی رہی۔

اور پھر نہ جانے کیسے اُس کے ذہن نے ایک کروٹ لی، 

ایک دن جب اُس کا خاوند بہت مدہوشی اور جنون میں اس کے ساتھ جنسی عمل کرنے کی "تیاری" کر رہا تھا اور جیسے ہی اُس نے اُس کا بالائی لباس الگ کر کے اُس کے پستانوں کو چومنا شروع کیا ، بیوی نے دھیرے سے ذکر چھیڑ دیا ، آج میں بازار سے ایک انگیا لائی تھی، پتہ نہیں کیسے سائز غلط نکل آیا ، وہ مجھے کچھ بڑی نکلی لیکن میں نے بھی ضائع نہیں جانے دی، وہ اماں (ساس) کو پوری آ گئی اور میں نے اُن کو ہی دے دی، اماں کا اور میرا دیکھنے میں ایک ہی سائز ہے حتیٰ کہ رنگ اور گولائی بھی ایک ہی طرح کی ہے لیکن بس انگیا کا سائز ان کا تھوڑا بڑا ہے۔

یہ کہانی کا اگلا حصہ بتاتا ہے کہ خاوند کا کیا حال ہوا اور اُس کو کسی درجے کی ذہنی اور جنسی اذیت ملی لیکن کیا یہاں پر اعضاء کے نام ، ساخت اور تذکرے کے بغیر کہانی اپنا مضمون بیان کر سکتی تھی، کیا یہاں اشارے وہ کام کر سکتے تھے جو براہ راست الفاظ نے کیا۔

یہ فحش نگاری نہیں ہے، ہاں اگر بیوی کی نفسیاتی تبدیلی کے اشارے موجود نہ ہوں ، اُس کے انتقام کی رو کہانی میں بہتی ہوئی نظر نہ آئے اور خاوند کو ملنے والی اذیت کا احساس کہانی کے چہرے پر مسکراہٹ بن کر نہ بکھرے تو یہ ایک عامیانہ رسالے کی بے ہودہ لائنز کے سوا کچھ نہ ہو گا۔ 

ردی کا ڈھیر۔

وہ حیرت سے آسمانی صحیفوں، آئین کے پلندوں اور قانون و اخلاق کی کتابوں کے اُس ڈھیر کو دیکھ رہا تھا جسے محفوظ کرنے اور سنبھالے رکھنے کے لئے عجائب گھر کی انتظامیہ خواہ مخواہ اُس کو تردد میں ڈالے ہوئے تھی،

اُسے ہزار کوشش کے باوجود کبھی اُس میں کوئی کارآمد بات کوئی مثبت خیال نہ مل سکا تھا

دور جہالت کی ہر بات ہر عمل جو کہ کاغذ کے اُس تاریخ دان میں محفوظ تھا بالکل مضحکہ خیز اور بے ہودہ سا تھا

وہ سوچ میں گم طنزیہ انداز میں مسکرائے جا رہا تھا، ردی کے اس ڈھیر کی وجہ سے اُس دور میں لوگ کیسے کیسے ظلم و ستم کا شکار رہے ہوں گے، کسی پریشانی کسی ٹینشن کی وجہ سے ایک معمولی سا قتل ہو گیا، تو جیل یا پھانسی، کسی ضرورت کے تحت کوئی چھوٹا موٹا ڈاکہ ڈال لیا کوئ چوری کر لی تو جیل اور قید کسی نے عین جسمانی تقاضوں کے ہاتھوں مجبور ہو کر کسی عورت کو پکڑ لیا تو سزا، کوڑے قید یا جیل ۔۔۔۔۔ بھلا یہ بھی کوئی بات ہے ۔۔۔ اور ایک آج کا سنہرا دور ہے جب علم و دانائی نے ہماری دنیا کا نقشہ ہی بدل دیا ہے

ہم نے کیسے کیسے مشکل معاملے کو مذاکرات کے ذریعے حل کیا، مذاکرات کی ایک نعمت نے کیسے الہامی ادیان، آسمانی صحیفوں قانون ساز اداروں، انتظامیہ، عدلیہ ، آئین کے پلندوں ، قانون کی دستاویزوں ، جیلوں، بھانسی گھاٹوں ، سے ہمیں نجات دلا دی ۔ اچانک فون کی گھنٹی نے اُسے جھنجھوڑ دیا، 

مذاکراتی مرکز۔۔۔؟؟؟ دوسری طرف سے ایک گھبرائی ہوئی آواز سنائی دی

جی ۔۔۔ فرمائیے وہ تحمل سے بولا

چند لوگ ایک شخص کو قتل کر کے اُس کا سر تن سے جدا کر کے اُس سے فٹ بال کھیل رہے ہیں، کیا آپ ایک مذاکراتی ماہر کو روانہ کر سکتے ہیں 

جی بالکل پتہ لکھوائیے۔۔۔

فون رکھ کر پگڑی سر پر ٹھراتے ہوئے وہ سوچ رہا تھا

ضرور ان معصوم لوگوں کو بچن میں کھیل کود کے مناسب ذرائع میسر نہ رہے ہوں گے، اسی لئے تو بچارے اس طرح کا ردعمل ظاہر کرنے پر مجبور ہوگئے۔ مذاکرات پر آمادہ ہو جائیں تو بات ہے۔

ہمارا تہذیبی بحران اور اردو افسانہ۔

اگر جولیا کرسٹیوا نے تذلیل (Abjection) پر بات نہ کی ہوتی اور اس کوایک باقائدہ نفسیاتی و ادبی موضوع کی حیثیت تک نہ لے گئی ہوتی تو یہ لفظ ڈکشنری میں پڑا سڑ رہا ہوتا۔ اگر اکیسویں صدی کے دروازے پر(1993-1996) کھڑے ہو کر امریکی ماہر سیاست

سیموئل فلپس ہٹنگٹن نے تہذیبوں کا تصادم نہ لکھی ہوتی تو گزشتہ دھائیوں کے دوران تہذیب کی تعریف اور تہذیبوں کے تقابل پر مباحث میں ہر خاص و عام دلچسپی نہ لے رہا ہوتا۔ 

حسن اتفاق ہے کہ تہذیبون کا تصادم ہو، تہذیبی انہدام ہو یا تہذیبی بحران ہو ایبجیکشن کو یہاں بھی ایک خاص اہمیت حاصل ہے۔

اس بحث میں پڑے بغیر کہ سیموئل کی پیشین گوئی درست ثابت ہوئی یا نہیں اور اس نظریے کو بلا غور و فکر مانے بغیر کہ اکیسویں صدی بالخصوس نائن الیون کے بعد کا عالمی منظر نامہ تہذیبوں کے تصادم کاشاخسانہ نہیں ہے بلکہ فقط سیاسی و معاشی مفادات کی حفاظت اور سرمایہ دارانہ نظام کی طرف سے اپنے حق میں جاتے ہوئے عدم توازن کو برقرار رکھنے کی ایک سیاسی کوشش ہے آئیے ایک نظر تہذیب و تمدن کی تعریف پر ڈالتے ہیں، کیونکہ بہت سے قضیئے لسانی مبالغوں کے علاوہ کوئی اور جواز نہین رکھتے اور بہت سے مسائل الفاظ و معانی اور ان کے سماجی تعلق پر غور کرنے سے ہی حل کئے جا سکتے ہیں۔

تہزیب و ثقافت کیا ہے:

ثقافت " کے معنی ہیں ۔ عقلمند ہونا ۔ نیک ہونا ۔

تہذیب بمعنی ۔ ترتیب ۔ تہذیب ۔ پرورش کرنا ۔

کلچر کا مطلب ہے

, کاشت کرنا ۔۔۔ اور 

کسی فرد یا معاشرے میں فنون و ادب، تعلیم و تربیت اور سوچ و تفکر کے نتیجے میں پیدا ہونے والے فرق کی وجہ سے محسوس ہونے والی تبدیلی کو بھی کلچر یا ایسے فرد یا معاشرے کو کلچرڈ کہاجاتا ہے۔ 

مریم ویبسٹر ڈکشنری

کسی معاشرے کی علوم و فنون سے وابستگی کے نتیجے میں حاصل ہونے والی حالت یا یاکیفیت

ایک مربوط، منظم اور ترقی یافتہ معاشرہ

بین الاقوامی اجتماعی معاشرہ۔

خیال کی پرواز

کسی معاشرے کے ترقی یافتہ خطے کی سہولیات کی کیفیت۔

آکسفورڈ ڈکشنری

ایسا تسلسل یا طرز فکر جس سے کہ ایک معاشرہ اپنے کمال کو پہنچتا ہو۔

کمال کی اُس کیفیت کا نام۔

کسی مخصوص خظے یا دور کے عوام کا طرز بود و باش اور تمدن۔

جدید زندگی اور جدید معاشروں کی سہولیات و خدمات

کیمبرج ڈکشنری

۔ کسی قوم ۔ مِلّت یا گروہ کے کسی خاص دور میں بود و باش کا طریقہ بالخصوص عمومی عادات ۔ رسوم ۔ روایات اور عقائد

۔ اگر صرف فَنون سے متعلق ہو تو موسیقی ۔ ہُنر ۔ ادبی علوم یا تمثیل گھر

ویکیپیڈیا 

ریاستی افعال و سرگرمیوں کا ایک ایک مجموعہ جس میں مندرجہ ذیل میں سے چند ایک یا سب ادارے شامل ہوں مثال کے طور پر اجتماعات کے مقامات و صلاحیت، رسم تحریر اور تمدنی زندگی۔

مطلب یہ ہوا کہ تہذیب و ثقافت، کلچر و سیولائزیشن دو معنی میں استعمال ہونے والی تراکیب ہیں؛

اول: کسی قوم، معاشرے یا گروہ کی تربیت یافتہ شکل اور ان کے قوانین ، آئین ، تاریخ وغیرہ اُن کی شعوری بالیدگی، قانونی سماجی و سیاسی اداروں کی صلاحیت کاری و استعداد

دوئم:اس تہذیب یافتہ، ترقی یافتہ، بالیدہ، باصلاحیت مقام تک پہنچانے والے اور اس سطع کو قائم رکھنے والے عوامل عادات، رسوم و رواج، جیسے، مذہبی نظریات، شعر و ادب، تاریخ سے شغف سائنس سے شغف، فنون لطیفہ و فلسفہ کا اجتماعی جمالیاتی ذوق۔

اگر ہم گیارہ ستمبر کے بعد کے منظر نامے پر نظر دوڑائیں، سیموئیل کی پیشن گوئی کو ذہن میں تازہ رکھیں اور تہذیب و ثقافت، کلچر و سیولائزیشن کی درج بالا تعریف کو سامنے رکھیں تو ہمیں اس نظریے سے زیادہ اس کے جواب میں آنے والی تنقیدی آراء اور بالخصوص اس خیال میں زیادہ جان نظر آتی ہے کہ تہذیب و ثقافت ایک زیادہ وسیع تصور ہے اور اس میں تصادم ممکن تو ہے لیکن اس قدر آسان نہیں ہے 

سیموئل نے اپنے ابتدائی مضمون یا بعد میں چھپنے والی کتاب میں جن تہذیبوں کا ذکر کیا ہے ( مثال کے طور پر مغربی تہذیب، لاطینی امریکی تہذیب، قدامت پسند تہذیب، مشرقی تہذیب، چینی تہذیب اور مسلم تہذیب) ان میں سے اکثر نے اس خیال کو سنا، پڑھا، جائزہ لیا اور اس خیال سے کسی منطقی یا علمی نوعیت کا اتفاق یا اختلاف کیا لیکن دوسری طرف سوائے ایران کے مسلم تہذیب یا مسلم ممالک کی تہذیب ( میرے خیال میں یہ دو الگ حقیقتیں ہیں) نے حسب روایت کوئی جواب دینے، اختلاف کی صورت میں کوئی منطقی استدلال پیش کرنے یا اتفاق کی صورت میں کوئ مثبت رائے دینے کی بجائے بڑھ چڑھ واویلا مچایا اور اس نظریے کو مغرب بالخصوص امریکہ کا ایک مبنی بر دروغ پروپیگنڈہ کہا اور اسے مسلم امہ کے خلاف ایک سیاسی چال کہا قابل تاسف بات یہ ہے کہ سیاسی یا مذہبی حلقوں اور ریاستی اداروں کی طرف سے تو خیر لیکن ادبی حلقوں میں بھی نہ اس اہم ترین خیال پر کچھ لکھا گیا اور نہ ہی اس کو پس منظر میں رکھ کر کوئی تخلیق سامنے آئی مجھے نہیں یاد پڑتا کہ بالخصوص پاکستان میں کوئی ایک بھی افسانہ یا ناول اس تناظر میں منظر پر آیا ہو اور ستم ظریفی یہ کہ سیاسی اور مذہبی حد تک یہی مسلم ممالک دانستہ یا نا دانستہ طور پر اس نظریے کو سچ ثابت کرنے کا آلہ کار بنتے نظر آتے رہے۔

تہذیبوں کے تصادم کے نظریے کے جواب میں جس خیال کو سب سے بہتر پذیرائی ملی وہ سابق ایرانی صدر خاتمی کا "تہذیبوں کے مابین مکالمہ" کا تصور تھا۔

اسی خیال کو ایران کی طرف سے جنرل اسمبلی میں ایک ریشولیشن کے طور پر پیش کیا گیا جس کو اکثریت کی حمایت حاصل

رہی اور اسی کی بنیاد پر1998 میں اقوام متحدہ نے سن2001 کو تہذیبوں کے مابین مکالمے کا سال قرار دیا۔ 

خاتمی کا یہ جواب اور اس کی بین الاقوامی پذیرائی ایک مثبت طرز فکر کی نشاندہی کرتا ہے اس سے کسی تصادم کے "خوف" اور کسی تہذیب کو زیر کرنے کی سوچ یا کسی تہذیب کے حاملین میں عدم تحفظ کے احساس کی بیخ کنی کرنے کے طرز عملای کے اشارے ملتے ہیں اس سوچ سے تصادم کی بجائے مابعد جدیدیت کا رنگ جھلکتا ہے کہ کوئی ایک غلط نہیں ہے تو پھر سب غلط نہیں ہیں اگر کوئی ایک بہتر ہے تو پھر اپنی اپنی جگہ سب بہتر ہیں۔ یہ خیال تہذیب و تمدن کے معروضی بنیادوں پر درست یا غلط کے جھگڑے کو موضوعی بنیاد پر تقابل و مکالمے کے فروغ میں بدلنے کی ایک کوشش ہے۔

یہ تو تھا سیموئل کی کتاب یا تہذیبوں کے تصادم کے نظریے اور اُس کے حقیقی یا باطل ہونے اور اُس کے جواب میں آنے والے ایک مثبت جواب کا احوال لیکن وہاں کیا کیا جائے جہاں نہ تو کوئ ایک بھی اہم کتاب منظر پر آئی نہ کتاب یا نظریات کا علمی و تنقیدی جواب دینے کا رواج رہا نہ کسی نے اس مفلوک الحالی اس قحط الرجال پر تاسف کرنے کی یا کڑھنے کی زحمت کی۔۔۔۔۔۔۔۔۔

بلکہ جہاں تہذیبوں کے تصادم کی بجائے تہذیبی انہدام کا اہتمام ہوتا رہا ایک معاشرے کو اندھا بہرا اور مفلوج کر کے اپنے مطلوبہ نتائج حاصل کئے گئے۔۔۔۔۔ جی بدقسمتی سے یہ اس ملک کا تذکرہ ہے جہاں تہذیبی انہدام کے بعد بعد

اب ایک خلا ایک ابتلاء ایک تہذیبی بحران کا دور ہے۔

یہاں یہ بات واضع کر دینا ضروری ہے کہ پاکستان میں موجودہ حالات کا تجزیہ کرنے اور اُس کی جڑیں ماضی قریب و بعید میں ڈھونڈنے کا کہ یہ مقصد قطعا نہیں ہے کہ ہم کالی بھیڑ بن کے پاکستان کے قیام ، پاکستانی عوام یا ان کے جذبات و قربانیوں پر تنقیص محض کرنے لگیں، اور نہ ہی پاکستانی عوام یا بالکل غیر جانبدار و خالصتاغیر جانب دار و غیر جذباتی تحقیق نگاروں یا تجزیہ کاروں کے علاوہ کسی کو اس بات کی اجازت دی جا سکتی ہے کہ وہ پاکستانی عوام کی ذہنی و جذباتی کیفیت چاہے قیام پاکستان سے پہلے ہو یا بعد میں پر کسی قسم کی رائے زنی کرتا پھرے کیونکہ بحر حال عوامی خلوص و قربانی کسی بھی شک و شبے سے بالاتر رہی۔۔۔۔۔ یہاں حال ہی میں پاکستان میں چھپنے والے اقبال حسن خان کے ایک ناول "گلیوں کے لوگ" میں پیش کیئے جانے والے منظر نامے اور اس ناول کے کرداروں کی خود کلامیوں اور مکالموں کو دہرانا شاید اس فرق کو سمجھنے میں ممد ہو گا۔۔۔۔۔ گلیوں کے لوگ میں مصنف نے بڑی خوبصورتی اور چابک دستی سے کرداروں اور مکالموں کی زبانی ۔۔۔۔۔۔۔۔۔قیام پاکستان کے وقت متحرک تینوں طرح کے نظریات کو اجاگر کرنے کی کوشش کی ہے ۔۔۔۔ ایک مولانا آزاد نظریہ جو پاکستان بنانے کا سماجی و ثقافتی عقلی بنیادوں پر مخالف تھا اور جسے وہ نظر آ رہا تھا جو شاید "بقول اُن کے" جناح صاحب کو نظر نہیں آ رہا تھا کہ مسلمانان خطہ کا ثقافتی ، تمدنی و تاریخی تعلق اپنے ماضی قریب سے قطع ہو جائے گا اور ایک ثقافتی قطع تعلقی یا انہدام کی صورت پیدا ہو جائے گی ۔۔۔۔ دوسرا جناح صاحب یا مسلم لیگ کا نظریہ کہ ۔۔۔۔ لوگوں کے مذہبی جذبات کی طاقت کو ساتھ ساتھ رکھ کر ایک نئے ملک کی بنیاد تو رکھی جائے لیکن اُس کو کسی بھی ایک گروہ کے حوالے کرنے کی بجائے اُسے ایک فلاحی ریاست بنانے کی کوشش کی جائے جہاں سب کو اپنے اپنے نظریات کے مطابق مکمل آزادی حاصل ہو اور تیسرا جاگیرداروں، وڈیروں اور مذہبی ٹھیکیداروں کا نظریہ جو قیام سے پہلے اپنے ذاتی مفادات کی وجوہ پر اختلاف کرتے رہے اور قیام کے بعد بھی اپنے ذاتی مفادات کے تحفظ کے لئے نظریات کو ہانی جیک کرنے میں لگے رہے ۔۔۔۔

یہ بات ہمارے بہت سے "روشن خیالوں" کے دل کو لگتی ہے کہ کہ جناح صاحب کی سیاسی کوششیں مذہبی ملمع کاری سے بے نیاز تھیں لیکن جب انھوں نے دیکھا کہ عوام اور خاص کر ناخواندہ اور سیاسی شعور سے بے بہرہ عوام کو اکھٹا کرنے اور متحرک کرنے کے لئے مذہبی نعرہ ایک بہتریں پلیٹ فارم ہے اور یہ کہ اس کے بغیر عوام کا سیاسی شعور بیدار کرنے کے لئے صدیوں نہیں تو برسوں درکار ہیں تو انھہوں نے اس قوت کو ضائع کرنے کی بجائے اس کو ایک مثبت رخ کی طرف موڑ دیا۔۔۔(۔اب یہ ضروری نہیں ہے کہ تاریخ اسے ایک پرخلوص حکمت عملی کے طور پر ہی یاد رکھے۔ تاریخ اس کو ایک فاش سماجی غلطی یا ایک ظالمانہ سیاسی چال کے طور پر بھی محفوظ کر سکتی ہے ) مثبت رخ کی طرف موڑنے سے میری یہ مراد ہے کہ عوام کے جذبات کو جٹھلانے اور اُن کو سیاسی دھارے سے کاٹنے کی بجائے اس خیال کو بھی اسی طرح رہنے دیا گیا کہ یہ نیا ملک اسلام کے نام پر حاصل کیا جا رہا ہے اور ساتھ ساتھ اس نظریے کی اصلاح بھی کی جاتی رہی کہ اسلام کے نام پر ملک سے مراد تھیوکریسی یا ایک اسلامی ریاست نہیں بلکہ ایسا ملک جہاں پر ہر ایک کو مذہبی ، سیاسی اور ثقافتی آزادی حاصل ہو گی۔ 

لیکن اس بد قسمت خطہ ارضی کے ایک ملک بنتے ہی ایک ایسی افراتفری ایک آپا دھاپی شروع کی گئی اور بجائے اس نوآزاد خطے کو خود پھلنے پھولنے اور پنپنے کا موقع دینے کے اسے اپنی ذاتی پسند و ناپسند کے شکنجے میں کَس دیا گیا۔۔۔ ابتداء ہی سے یہ بحث چھیڑ دی گئی بلکہ بحث کیا یک طرفہ طور پر یہ فیصلہ کر لیا گیا کہ یہ ملک جمہوریت ، بنیادی انسانی حقوق کی دستیابی، برابر معاشی و سماجی مواقع یا آزادی کی فضاء میں پھلنے پھولنے کے لئے نہیں بلکہ اسلام کی تجربہ گاہ کے طور پر وجود میں لایا گیا ہے کیا اسلام کو خلافت راشدہ کے ، اموی، عباسی، فاطمی، عثمانی اور مغل ادوار کے بعد بھی ابھی تجربہ گاہ کی ضرورت تھی کیا اس طرح کا نعرہ لگانے والوں کو اسلام کی حقانیت پر ایک لاشعوری شک نہیں تھا، اورکیا اسلام کے سنہری دور کے "تجربات" کے علاوہ وہ کوئی اور تجربہ کرنا چاہتے تھے۔۔

چلو بہت سے دلائل کے باوجود یہ مان بھی لیا جائے کہ ایسا ہی تھا تو پھر اِس تجربہ گاہ کا میں اسلام کو لٹاتے ہی اس کا رشتہ اس کے اپنے ہی مادی وجود سے کیوں کاٹ دیا گیا، اسلام کو خالص بنانے کے جنون میں اسے ایک ہی جست میں چودہ سو برس پیچھے کی دیوار پر ٹانک دیا، مذہب تہذیب و تمدن کا ایک اوزار ہے ثقافت، تہذیب ، تمدن کے استحکام، اور عروج کے لئے قانون، ادب، آرٹ ، لوک ورثہ، لسانی سرمایے، تاریخ کے تسلسل کی بھی ضرورت ہوتی ہے اور ان سب اجزاء کو چھوڑ کر بلکہ جھٹلا کر جب ایک ہی جزو کو آنکھوں پر باندھ لیا گیا تو لامحالہ اُس معاشرے اُس خطے کے تہذیبی وجود نے منہدم ہونا ہی تھا۔۔۔۔

یہ سلسلہ چلتا رہا ، تقسیم ہند سے پہلے ہم اپنے ہندو پڑوسیوں کو جن مغل بادشاہوں کے نام اور قصے گنوا کر اپنا تفاخر جتاتے تھے پاکستان بننے کے بعد ہم نے انہی ہیروز کو "غیر اسلامی" کہہ کر سیدھا خلافت راشدہ کو گلے لگا لیا،امن، مومن، دبیر، میر، اور غالب و سودا کو ہم "اپنے شاعر" کہتے نہیں تھکتے تھے لیکن پاکستان بنتے ہی وہ ہندوستانی ہو گئے اور ہم نے سرے سے شاعری کو ہی حرام کہنا شروع کر دیا ہم جس امیر خسرو، ظفر خان، پیارے خان، واجد علی شاہ، وزیر خان،امیر حسین خان، بڑے غلام علی خان،بسم اللہ خان کو ہندوستانی موسیقی میں اپنا عظیم سرمایہ سمجھتے تھے اُن کو ہم نے اپنے ماضی کی ایک غلطی

ایک شرمندگی قرار دینا شروع کر دیا۔

میدان جنگ میں تلوار ننگی ہی اچھی لگتی ہے لیکن گھر لوٹ کر بھی اگر برہنہ شمشیر لہراتے رہو تو بیوی بچے کٹ جاتے ہیں انسان احمق لگتا ہے، انفرادی زندگی کی طرح معاشرتی زندگی میں بھی نظریات و خیالات ، معاملات و اعمال کا کوئی نہ کوئی زمانی و مکانی حوالہ ہوتا ہے۔۔۔۔ پاکستان بننے سے پہلے اگر کچھ لوگ یا گروہ مذہبی نظریات و عقائد کی ایک رزمیہ کی طرح سے پر زور تکرار کرتے تھے تو وہ اُس وقت اور اُن حالات کے مطابق ضروری تھا لیکن ایک ہنگامی حالت اور اُس کی ضروریات کو مستقل قومی مزاج بنالینے کی غلطی بہت بڑی غلطی تھی اپنے قومی وجود کو اپنے ماضی قریب کے سرمایے سے، کاٹ دینا ایک ایسے خلاء کو ایک ایسے ویکیوم کو پیدا کرنے کا موجب بنا جس نے معاشرے کی رنگینی، تہذیب و تمدن کا اعتبار ختم کر دیا ہر شخص "سب کچھ غلط تھا" کے نعرے کے بہاؤ میں آ کر ماضی بعید سے اپنی بنیادوں کے لئے پتھر لانے کے فکری صحرا میں ایسا گم ہوا کہ قومی وجود کا شیرازہ ہی بکھ گیا ۔ 

رفتہ رفتہ سیاسی بالیدگی آ رہی تھی، سماجی شعور پختگی کی عمر میں داخل ہو رہ تھا، قومی مزاج اس خلاء کو پُر کر رہا تھا، لوگوں کو اس بات کا احساس ہو رہا تھا کہ ایک طرف تو چودہ سو سال پرانی اپنی بنیاد سے رشتہ استوار رکھنا ہے اُسی پر قدم جما کر کھڑا ہونا ہے لیکن دوسری طرف درمیانی عرصے کو دیواروں کی طرح استعمال کر کے ہی ایک گھر بن سکتا ہےلیکن ایک بار پھر بدقسمتی ہماری حماقت کی دعوت پر ہماری مہمان بنی بالخصوص اسی کی دہائی سے پاکستان دو بیرونی ملکوں کی کشمکش کا اکھاڑہ بنا ، عالمی سطح پر تہذیبی تصادم ہو نہ ہو علاقائی سطح پر دو مختلف سیاسی، قومی اور فقہی نظریات کے تصادم سے پاکستان میں تہذیبی تنزلی کا دور شروع ہو ا اور اس بار پھر ٹھیکیداروں نے ہاتھ آئے موقع سے بھر پور فائدہ اٹھاتے ہوئے عوام کی آنکھوں پر خود پسندی، جھوٹے تفاخر ، خالص اسلام کی بازیافت اور اسلام کے قلعے جیسے نعروں کی پٹیاں باند کر تنہائی ، قطع تعلقی اور خود فریبی کے کنوؤں میں پھنک دیا۔۔۔۔ہمارا ہماری مشترکہ ( شاید گنگا جمنی تہذیب کہنا کچھ ایسا غلط بھی نہیں) تہذیب و ثقافت سے بچا کچا رشتہ بھی کاٹ دیا گیا ۔ 

اور ہم اکیسویں صدی میں ہم اس طرز فکر کے ساتھ داخل ہوئے ہیں کہ غالب نے کہا "غالب ندیم دوست سے آتئ ہے بُو دوست، مشغول حق ہوں بندگی بو تراب میں" اور چونکہ غالب نے بو تراب کی بندگی کی بات کی ہے اس لئے وہ کافر و مشرک تھا، تان سین اور سوامی ہری داس کی تو خیر بات ہی چھوڑیں امیر خسرو نے موسیقی کی بات کی ، موسیقی اسلام میں حرام ہے اس لئے امیر خسرو بھی ایک کافر تھا۔۔۔۔ بھلے شاہ نے خود کہا کہ اُسے پتہ ہی نہیں کہ وہ مسلمان ہے یا نہیں اس لئے وہ بھی کافر تھا۔۔۔۔ 

بحث یہ نہیں کہ اس میں کس کا ہاتھ ہے کس کا نہیں، کوئی خفیہ ہاتھ ہے یا سب اپنے ہی ہاتھ ہیں لیکن دستانے پہنے ہوئے ہیں غور طلب بات یہ ہے کہ قومی اداروں نے، ذمہ داروں نے، پالیسی سازوں نے، قانون سازوں نے، شاعروں ، ادیبوں نے اس نازک موڑ پر کیا کردار ادا کیا۔۔۔۔

اصولی بات تو یہ ہے کہ تمام سٹیک ہولڈرز کو چاہے وہ قانون ساز ہوں، عقل و شعور رکھنے والے علماء ہوں، درد دل رکھنے والے ادیب ہوں یا سماجی تنظیمیں ہوں کو ہر طرح کی مسلکی و سطحی سوچ سے بلند ہو کر اس تہزیبی شکست و ریخت کا اس تنزلی کا اس بحران کا احساس کرنا چاہئے تھا اور پھر اپنی قومی شناخت، اپنے ملکی تشخص کو بچانے کے لئے میداں عمل میں کود پڑنا چاہئے تھا لیکن بد قسمتی سے ایسا ہوا نہین اور ہر سطح پر ریاستی و سماجی ادارے انتشار کا شکار ہونے لگے۔۔۔۔۔ تقسیم ممکن نہ تھی کیونکہ تصادم کا ہوا کھڑا کرنے والے، بحران کو ہوا دینے والے اقلیت میں تھے اور اُن کے سرکردگان باہر بیٹھے تھے۔ لیکن انحطاط و بحران منطقی نتیجہ تھا جس تک ہم پہنچ گئے۔

اب تو یہ تخریب کاری یہ مبنی بر جہل رویہ یہ قول و فعل کا تضاد یا یہ نظریاتی منافقت اس حد تک زور پکڑ چکی ہے کہ ریاست اس کے آگے بے بس ہے ۔ چھوٹے چھوٹے روز مرہ کے معاملات سے لے کر قومی نوعیت کے مذہبی و سیاسی فیصلوں تک ہر طرف ایک سنگین صورت حال ہے۔۔۔۔

مذہب و سیاست کے تناظر میں اگر ہم حال ہی کا جائزہ لیں اور ہندوستان میں تازہ ترین انتخابات کے موقع پر ، دیو بندی علماء کی طرف سے ہندوستانی مسلمانوں کو مخاطب کر کے شائع کئے گئے سیاسی مشورے پر ایک نظر ڈالیں تو قطع نظر اس کے کے اسی مکتبہ فکر کا پاکستان میں جمہوریت اور سکیولر ازم کو حرام قرار دینے اور ہندوستان میں سیکولر ازم کی نہ صرف حمایت بلکہ اسے مودی کے خلاف ایک "اسلامی" ہتھیار کے طور پر ضررو بالضرور استعمال کرنے کا فرق انتہائی مضحکہ خیر نظر آتا ہے۔۔۔۔ یہ طرز عمل یہ فکر ایک اور اہم نقطے کی طرف بھی اشارہ کرتا ہے کہ مذہبی بنیادوں پر ٹکراؤ اصولی سے زیادہ سیاسی ہے اور اس کو خالصتا سیاسی مقاصد کے کئے ہی استعمال کیا جا رہا ہے اور یہ کہ ہندوستان اور پاکستان میں مسلمان عوام کاسیاسی مقاصد کے لئے استعمال ہونے والے مذہبی نعروں کا تناظر بالکل الک الگ ہے یا کم از کم سیاسی ملاؤں نے ایسا کرنے کی ٹھانی ہوئی ہے۔ تو کیا اس کا یہ مطلب ہے کہ ایک ہی مذہبی نظریہ یعنی اسلام پاکستان میں تو اسلامک تھیوکریسی کی حمایت کرے گا اور لبرل و سکیولر نظریات کو کفر قرار دے گا اور یہی نظریہ ساز ہندوستان میں سکیولر ازم اور لبرل ازم کا دفاع اسلامی احکام و شریعت کی روشنی میں کریں گے اور اس مقصد کے لئے شاید چند احادیث و واقعات بھی بہم پہنچا لیں گے۔

گو مذہب کا پرچار کرنے والوں کی نظر میں یہ مثلحت پسندی یا زمینی حقائق کے مطابق فیصلہ کرنے کی صلاحیت ہو لیکن ادب کی نظر میں یہ منافقت و سماجی و اخلاقی معیار سے گراوٹ ہو گی۔۔۔۔ لیکن کیا ہمیں اطراف کے سیاسی و سماجی حالات کا ادراک کرتے ہوئے ادبی ذمہ داریوں کے تنوع کا ادراک بھی اس ڈر سے کرنا چھوڑ دینا چاہئے کہ ادب مذہب کے تابع ہے۔۔۔۔

بات چونکہ ادب اور بالخصوص افسانے کی ہو رہی ہے تو آئیے اُسی کا احوال دیکھتے ہیں۔۔۔ 

اردو اور ہندی بولنے اور سمجھنے والے پاکستان میں بھی ہیں اور ہندوستان میں بھی ، افسانہ دونوں طرف لکھا جاتا ہے لیکن

آپ ایک غیر جانبدارانہ قاری کی حیثیت سے یا ایک عام شہری کی حیثیت سے بنظر غائر اسی کی دہائی کے بعد پاکستان میں تخلیق ہونے والے ادب بالخصوص افسانے کا جائزہ لیں آپ کو کتنے افسانے ایسے نظر آتے ہیں جن میں اس المیے اس تہذیبی بحران کے اشارے یا اس غم و اندوہ پر کوئی آنسو کوئی کراہ یا کوئی سرد آہ ہی سنائی یا دکھائی دے جائے۔

۔۔۔۔۔ گو فکری قدریں وہی ہیں ادب کی جمالیات وہی ہے، اسالیب وہی ہیں اور مضوعات تنوع کے باوجود انسان اور معاشرے کے گرد ہی گھوم رہے لیں لیکن آج کا دورانٹر نیٹ کا دور ہے سوشل میڈیا کا دور ہے اور اس تبدیلی کی وجہ سے ایک فرق یہ بھی پڑا کہ اب براہ راست قاری و تنقید نگار کی رائے سے تعامل کا موقع مل جاتا ہے کسی افسانے کسی تحریر پر اشاعت کے عرصہ بعد ایک یک طرفہ رائے موصول نہیں ہوتی بلکہ فورا ایک تنقیدی مباحثے کا سا ماحول بھی میسر ہو جاتا ہے اور بہت سی آراء کے تقابل کا ماحول بھی بنتا رہتا ہے۔۔۔۔ افسانےاور افسانے کے موضوعات پر مباحث میں بہت دلچسپ صورت حال اُس وقت ہو جاتی ہے اور پاکستان میں موجود اس تہذیبی بحران کی سنگینی کا اندازہ بہت بہتر انداز میں ہونے لگتا ہے جب کسی افسانے پر بات کرنے ہوئے کسی تنقیدی مضمون پر رائے دیتے ہوئے کوئی باقائدہ قاری کوئی صاحب رائے تنقیدی نگار کوئی شاعر آپ سے کہنے کہ منٹو ایک مایہ ناز افسانہ نگار تھا میں کم از کم افسانے کی حد تک منٹو کو آئیڈیلائز کرتا یا کرتی ہوں لیکن بس ایک تھوڑا سا مسئلہ یہ ہے کہ وہ منٹو قدرے فحش نگار تھا اگر اور ہمیں آج اس ذمہ داری کا احساس کرنا چاہئے اور "ڈھکے چھپے " انداز میں افسانے لکھنا چاہئے۔

۔۔۔۔۔۔۔پاکستانی ادیب خود دو حصوں میں بٹ چکے ہیں ایک تو وہ جنہوں نے مذہبی خوف کے زیر اثر سوچنا، سمجھنا، بولنا ہی چھوڑ دیا اور ادب کو مذہب کے تابع مان کر سمجھوتے کی نرم و گرم شال اوڑھ لی ہے اور دوسرے وہ ایک وہ جو فنون و ثقافت سے شعر و ادب سے وابستہ تو ہیں لیکن انہوں نے معاشرے سے معاشرے کے درد سے اپنا رشتہ کاٹ کر بس جھوٹی "ادبی جمالیات "میں پناہ لے لی ہے اُن کا ماننا ہے کہ ادب کا بھلا سیاست، مذہبی معاملات اور ریاستی حالات سے کیا تعلق ادب تو ادب ہے لیکن کیا یہ نری بکواس کے سوا کچھ اور ہے ۔۔۔۔ ۔

یہ جواز غلط ہے کہ پاکستان کے اندر دہشت گردی کی فضاء میں بیتھا ہو ا تخلیق کار چونکہ خطرات میں گھرا ہوا ہے اس لئے ادب و مذہب کی اقدار کے مابین فرق کو سمجھے کے باوجود وہ اُس پر کچھ لکھ نہیں سکتا۔۔۔وہ علامت نگاری کہاں گئی جو بے موقع تو لکھی جاتی رہی لیکن اب خاموش ہے ۔۔ مرحوم منشاء یاد زمانی و مکانی لحاظ سے دہشت گردی کے مرکز میں تھے لیکن "تماشہ " لکھا۔۔۔گو علامتی ہی لکھا اور قلیل لکھا لیکن کچھ تو لکھا ۔۔ اقبال حسن خان تو منشاء یاد کی نسبت زیادہ نرغے میں ہے لیکن "گلیوں کے لوگ لکھا" اور خوب لکھا جو اس بات کا منہ بولتا ثبوت ہے کہ لکھنے والا لکھے بغیر نہیں رہ سکتا ۔۔۔۔ تخلیق خود اپنے آپ کو خلق کرواتی ہے۔۔۔ لیکن اس ناول پر ہونے والی تنقید خون کے آنسو رلاتی ہے یہ ایک ایسے ہجوم ایک ایسی بھیڑ کی عکاسی کرتی ہے جس میں قومی شعور، ادبی جمالیات اور تحمل و برداشت نام کو نہ ہو۔۔۔۔ ادیب حساس ہو تو مکانی فاصلہ اہم نہین رہتا ۔۔۔۔۔ اور اسی لیئے یہاں اس تہذیبی بحران کے پیچھے کارفرما اپنی ہی قومی و سماجی حماقت کے موضوع پر شموئیل احمد کے افسانے "آنگن کا پیڑ" کا ذکر نہ کرنا بے انصافی ہو گی۔۔۔ حیرت ہے کہ شموئیل جیسا حساس فنکار جو کبھی پاکستان آیا ہی نہیں وہ ہندوستان میں بیٹھ کر صورت حال کا سماجی و ادبی احاطہ کر سکتا ہے اور پاکستانی ادیب جو بیرون ملک مقیم ہیں اُن کا یہ واویلا ہے کہ چونکہ ہم ملک سے باہر ہیں اس لئے ہم حالات و واقعات کی سنگینی سے کٹے ہوئے ہیں۔۔۔۔۔ کیا سیاسی و سماجی منظر نامے سے جڑے بغیر کوئی ادیب کوئی اہم تخلیق کر سکتا ہے۔ 

بوریت۔

میلے میں باپ کی انگلی پکڑے گھومتا ہوا بچہ ،

 سر کے بل کھڑے ہو کر رسی پر بائسیکل چلانے والے مداری، 

سانپ کے جسم اور انسان کے منہ والی لڑکی اور 

شیر سے کرتب کرانے والے لڑکے کو بیزارگی سے دیکھتا ہوا بولا 

ابا یہاں تو سب کچھ بور کرنے والا اور پھیکا سا ہے

صبح ٹی وی میں جو خودکش دھماکہ دیکھا تھا اُس جگہ چلیں 

بہت مزا آئے گا۔

رکھوالی۔

 

 

 

اڑن کھٹولہ، پریاں اور ہماری بے زاری۔

ابا جی سے اکثر بحث مباحثہ اور بعض معاملات پر تنقیدی نوعیت کی گفتگو کا سلسلہ رہا کرتا تھا۔نظریات میں اختلاف تھا اس لئے اکثر اختلاف رائے بھی ہو جاتا اور بعض اوقات بات دودھ پتی یا کڑاھی گوشت کی شرط پر رکتی، ایک دفعہ ایسی ہی کسی گفتگو میں انسان کی ناشکری اور فطری اکتاہٹ پر بات پھنس گئی، ابا جی بضد تھے کہ انسان ہر حال میں نا شکرا ہے اور اگر اٗس کی ساری کی ساری خواہشات بھی پوری کر دی جائیں تو وہ شاکی ہی رہے گا اور کچھ ہی دیر میں اپنی تشنہ ترین حسرت کی باریابی سے بھی بے زار ہو جائے گا، میرا اس بات سے اختلاف تھا میرے خیال میں اگر خدا انسان کی تمنائیں بر لائے اور زیادہ کبریائی کا مظاہرہ نہ کرے تو انسان خوش و خرم بلکہ شکر گزار رہ سکتا ہے۔مثال کے طور پر، وہ چِڑ کے بولے، مثلا۔۔۔۔۔ جیسے ، میں نے کچھ مثالیں پیش کیں، جیسے ہمیشہ صحت مند اور جوان رہنے کی خواہش، ہواؤں میں اڑنے کی خواہش،یا سب سے بڑھ کر جو چاہو وہ پالینے کی خواہش، اب دیکھیں اگر مجھے ایک اڑنے والا غالیچہ یا کھٹولہ مل جائے، کچھ پریاں ہوں جو میری خدمت پر مامور ہوں ، مجھے اُڑاتی پھریں ، مجھے کھانے ، مشروب اور جو مانگوں وہ پیش کریں جہاں چاہوں وہاں لے جائیں تو کون کافر ہے جو بے زار ہو یا ناشکری کرے گا۔ ابا جی نے گاؤ تکیہ کمر کے پیچھے سے کھسکایا اور بستر پر دراز ہوتے ہوئے بولے ، اپنی کریہہ شکل لے کر میرے کمرے سے نکل جاؤ، میں تم سے مزید بحث نہیں کرنا چاہتا، مجھے پتہ تھا اب دو تین دن کوئی بات نہیں ہو گی اس لئے میں نے کھسکنے میں ہی عافیت سمجھی۔

میں ٹیکسی کے لئےادھر ادھر نظریں دوڑاتے ہوئے تصور میں ابا جی سے ہی باتیں کر رہا تھا اور یہ فیصلہ نہیں کر پا رہا تھا کہ بیس سال پہلے لگائی گئی شرط آج ابا جی کے مرنے کے دس سال بعد میں ان سے ہار گیا ہوں یا نہیں ۔ کیونکہ ایک دن آیاکہ میں اس منزل پر پہنچ گیا جہاں ایک خوبصورت سی پری نے میرے آگے جھک کر کہا، حضور اس طرف، اور میں شان بے نیازی لیکن ایک تمکنت سے چلتا ہوا آگے بڑھ گیا ، ایک بڑے سے غالیچے پر ایک محمل کے انداز میں ایک کھٹولہ سا بنا کر مخملیں پردے آویزاں کر کے بیچوں بیچ ایک خوبصورت صوفہ بھی سجا دیا گیا تھا، میں صوفے میں دھنس کر بیٹھ گیا، وہ پری ایک دوسری پری کو لے کر آئی اور دونوں میرے ارد گرد منڈلانے لگیں، ان کی معطر سانسوں اور گداز لمس نے پہلے تو ہمارے تن من کو ہوا میں بلند کیا اور پھر قاف کی چوٹیوں جیسے نشیب و فراز والے سراپوں کے ہلکے ہلکے ٹھوکوں اور خواب ناک مناظر نے جیسے مدہوش کر دیا، کبھی وہ میرے لئے لگائے گئے صوفے کو درست کرتیں، کبھی میرے اوپر سے لپک کر مخملیں پردے سنوارے جاتے کبھی مجھے اور کبھی محمل کو دیکھا جاتا ، پھر دونوں موءدب انداز میں ہاتھ باندھ کر میرے سامنے کچھ فاصلے پر کھڑی ہوگئیں، مجھے یقین نہیں آ رہا تھا کہ یہ خواب ہے یا حقیقت، شاید انھوں نے بھی میری حیرت و بے یقینی کو محسوس کر لیا اسی لئے ایک پری مسکراتے ہوئے میرے پاس آئی اور جھک کر بولی ، لگتا ہے ہمارے حضور کا اڑنے والے غالیچے کا یہ پہلا اتفاق ہے اگر حکم کریں تو ہم کچھ مدد کریں، میں نے انسانوں کی اجتمائی تکریم اور اپنے اشرف المخلوقات ہونے کا بھرم رکھتے ہوئے ایک شان بے نیازی سے کہا ، نہیں بھئی، اگر ہمیں کسی شے کی ضرورت ہوئی تو ہم تمھیں اشارہ کریں گے۔ ہمارے دل میں خیال گزرا کیا یہ غالیچہ کوہ قاف کی کہانیوں کی طرح اڑے گا بھی یا فقط ایک دکھاوا اور دھوکہ ہی ہے ، شاید وہ ہمارے دل کی آرزوئیں بھی جان سکتیں تھی اسی لئے تو انھوں نے ایک دلربا مسکراہٹ کے بدلے ہمیں درست ہو کر بیٹھے کی درخواست کی اور یہ لو، دفعتا ہماری محمل نے ایک ہچکولا سا لیا اور ہوا میں بلند ہو گئی، ہمارا دل جیسے اچھل کر حلق میں آ گیا لیکن بچپن کی حسرت کے پورا کرنے کی خاطر اور پری زادوں کے سامنے آدم زادوں کی حرمت بچانے کے لئے کچھ تو صبر و تحمل کا مظاہرہ کرنا ہی تھا سو ہم اطمینان سے براجمان رہے۔

غالیچہ کا بلند ہونا تھا کہ ہم پست ہونا شروع ہو گئے۔ ہمیں لگا جیسے ارد گرد کی ہر چیز بہت معمولی، چھوٹی اور بوسیدہ سی ہے، دونوں میں سے ایک پری ہمارے بالکل قریب آئی اور ہماری کان کی لو سے اپنے یاقوتی ہونٹ مس کرتے ہوئے سرگوشی کے انداز میں بولی حضور کی طبیعت بوجھل تو نہیں ہو رہی ہم نے نفی میں سر تو ہلایا لیکن ہماری سٹی کمبخت کہیں گم ہو گئی تھی جس کو اُس مہ رخ کی جھیل جیسی آنکھوں نے کہیں بھانپ لیا شاید اسی لیے اُس نے اپنی ایک بازو ہماری گردن کے پیچھے رکھی اور دوسرے ہاتھ سے ہمارے سر پر منتر کے انداز میں کچھ پھیرا ، یک دم ہلکی ہلکی مدہم سے روشنی اور یخ بستہ ہوا نے ہمیں اپنی آغوش میں لے لیا، لیکن اسی پر بس کہاں ہوئی ہماری مہرباں نےمحمل کی ایک دیوار پر اپنی مخروطی انگلیاں پھیریں اور جادو کے زور پر وہاں سے ایک چھوٹی سی ٹہنی سی نکال کر ہمارے کانوں سے لگا دی، ایک مدھر سی موسیقی ایک میٹھی سی تان نے جیسے ماحول میں رس گھول دیا اور ہماری پلکیں بوجھل ہونے لگیں اچانک ہمیں خیال آیا کہ ہماری اڑنے کی خواہش کا نقطہ کمال تو یہ حسرت تھی کہ ہم بادلوں پر تیرتے پھریں اور پرندوں سے بھی بہت اوپر اڑ کے دیکھیں کہ ہماریے گرد و نواح کی دنیا کیسی لگتی ہے، ہم نے آنکھیں کھولیں محمل کا پردہ سرکایا اور نیچے پھیلے ہوئے منظر پر حقیقت میں طائرانہ نظر ڈالی، اوہ خدایا کیا حسن ہے ، کیا خوبصورتی ہےتیری اس دنیا کی، تیری کائنات کی کیا بات ہے۔ زلفوں اور ان میں بسی خوشبو کی طرح اڑتے اور تیرتے ہوئے سیاہ و گلابی بادل اور اُن کے بیچوں بیچ تیرتے ہوئے ہم ، نیچے گلی محلے مکان بڑی بڑی سڑکیں بلکہ پورا شہر اس طرح دکھائی دے رہا تھا جیسے ہم کسی دوشیزہ کے ہاتھ کی لکیریں دیکھ رہے ہوں، بڑے بڑے پہاڑ کسی کے سینے کے زیر و بم کی طرح زمین کے مخملیں بستر پر محو استراحت نظر آ رہے تھے ، دریا کے کنارے کنارے درختوں کی قطاریں جیسے کسی آنکھ میں مہارت سے لگا ہوا کاجل ۔

بالائی سطح کے طلسم کی تو بات ہی کچھ اور تھی ہمیں پہلی بار احساس بلکہ یقین ہوگیا کہ جس کو ہم خلا کہتے ہیں وہ خلا نہیں ہے۔ وہ تو رنگ و نور، اور کیف و سرور کا ایک سمندر ہے ، جب آپ مادے کی قید سے تھوڑی آزادی حاصل کرنے میں کامیاب ہوتے ہیں تو آ پ کو پتہ چلتا ہے کہ مادہ کتنا حقیر کتنا، کثیف اور کتنا مادی ہے۔

اچانک کہیں سے ہمارے کاندھے پر پھولوں کی ایک ڈالی سی جھول گئی مڑ کر جو دیکھا تو ایک اور خوبصورت پری جو پہلی والی سے بھی کم سن ، حسین و جمیل اور شوخ ادا تھی ہمارے کاندھے پر ہاتھ رکھے کھڑی مسکرا رہی تھی، کیسا لگ رہا ہے حضور، بہت اچھا، ہم خوش ہوئے، ۔۔۔ کیا کچھ تناول فرمائیے گا، آں ، ارے ہاں کچھ کھانا چاہئے ہمیں تو خیال ہی نہ رہا کہ ہمیں کچھ بھوک بھی لگ رہی تھی۔ ہماری شوخ ادا نے ہمارے ہی پنگھوڑے پر کچھ پڑھ کر ہاتھ پھیرا اور چشم زدن میں وہاں کھانے کی ایک میز نمودار ہو گئی اس نے ایک زنبیل میں ہاتھ ڈالا اورپکوان اور مشروبات نکال نکال کر ہمارے سامنے قرینے سے پرونے لگی، تمام اشیاء ایک ہی جگہ سے برآمد ہونے کے باوجود کھانا اتنا تازہ اور گرما گرم اور مشروبات اتنے ٹھنڈے تھے کہ ہم ممنون اور مسحور ہوئے بغیر نہ رہ سکے ۔

کھانا کھا کر ہم اس قدر سرور میں آئے کہ پتہ ہی نہ چلا کب آنکھ لگ گئ نہ جانے کب تک ہم خواب میں بھی اور حقیقت میں بھی بادلوں اور فضاؤں پر تیرتے رہے، جب آنکھ کھلی تو اُس توبہ شکن کو اپنے بالکل پاس اپنے احکامات کی منتظر پایا، ہماری آنکھ کھلتے ہی اُس کے لب ہلے ، چائے دوں، کون کافر تھا جو انکار کرے ، گردن خود بخود اقرار میں جنبش کھا گئی لیکن اس معصوم کو ہمارے اندر کے کرب کا کیا اندازہ تھا ، وہ کرب جو جاگنے کے بعد پچھلے چند لمحوں کے ادراک میں ہم پر گزر گیا تھا، بھلا کس طرح ، وہ بھی ایک پری کو ، وہ بھی ہوا میں تیرتے ہوئے ، بادلوں کا جھولا جھولتے ہوئے ، فضاؤں میں مادے کی کثافتوں سے دور بلند و بالا ہوکر ، کس طرح ہم اس کو بتاتے کہ ہمیں رفع حاجت کے لئے جانا ہے ۔ لیکن یہ ایک حقیقت تھی، یہی اس وقت کی سب سے بڑی سچائی تھی۔

مرتا کیا نہ کرتا، پہلے ایک دو بار پنگھوڑے میں ہی کروٹیں بدلیں، کچھ پیٹ پر ہاتھ رکھ کر چہرے پر درد اور تکلیف کے تاثرات ابھارے اور پھر بڑی خجالت سے اپنی پری زاد کو ایک عامیانہ سا اشارہ کر کے اپنی طرف بلا لیا، اب جو وہ ہمارے قریب آ گئی تو اظہار تمنا کا مرحلہ درپیش آ گیا، لعنت ہو ایسے لمحے پر جب ایک خوبرو مہ رخ سے دل کا حال بیان کرنے یا عشق و محبت کے اظہار کی بجائے آپ کو بیت الخلا جانے کی خوہش کا اظہار کرنا پڑے ، لیکن مصیبت انسان سے بہت کچھ کراتی ہے، ہم نے بھی کیا اور اسکول دور کی ایک آزمودہ ترکیب سے کام لیتے ہوئے اپنی چھنگلی اٹھا کر مسکراتے ہوئے اٗس کی طرف دیکھا، ہائے رے اٗس کی خود سپردگی اور خدمت گزاری کہ اٗس نے ہماری انگلی پکڑی اور ہماری محمل کے ایک کونے میں جا کر پھر جادو کے انداز میں اپنے ہاتھ کو گردش دی ، یہ لو ہوا میں اڑتے ہوئے ہمارے سامنے دیوار میں ایک بیت الخلاء نمودار ہو گیا، اب اس سے بڑھ کر کیا ہو سکتا ہے، ہم جلدی سے اُس سے ہاتھ چھڑا کر اندر بھاگے اور نیچے اٗڑتے ہوئے تمام پرندوں اور بادلوں اور کسی حسینہ کی ہتھیلی کی لکیروں کی طرح پھیلی ہوئی گلیوں اور سڑکوں سے معذرت کرتے ہوئے بیٹھ گئے۔ 

باہر آ کر ہم نے پھر ایک طائرانہ نگاہ افق پر ، بادلوں پر پرندوں پر اور نیچے پھیلی ہوئی ارض خدا پر ڈالی، لیکن اس بار وہی مناظر دیکھ کر کچھ زیادہ جذباتی نہ ہو سکے، نیند تو پہلے ہی پوری کر چکے تھے سو اب سونے کا بھی امکان نہ تھا، ، کانوں پر لگی زیتون کی شاخ سے نکلنی والی موسیقی سے بھی دل بھر سا گیا، اب کیا کیا جائے ، ہم نے اپنے پنگھوڑے نما صوفے کی جیب میں ہاتھ ڈالا اور کچھ میگزین موجود پا کر خاصے مطمئن ہوئے لیکن کتنی دیر پندرہ منٹ کے بعد ان کو تہہ کر کے واپس پھینک دیا اور غصے میں آنکھیں موند کر گردن پیچھے ڈھلکا دی۔ 

چالیس پینتالیس منٹ کے بعد جب ہمارا کھٹولہ زمین پر اترا اور ہم اٹھ کر نیچے اترنے لگے تو دونوں پریا ں مسکراتے ہوئے بڑے مؤدب انداز میں بولیں ، حضور کچھ شکایت کوئی پریشانی، ہم نے نا گوار سا منہ بنا کر کہا ، آپ کی ائر لائن تو اچھی ہے لیکن چھوٹے جہاز استعمال کرتے ہیں اگر یہی سفر ایئر بس پر ہوتا تو پورے پچیس منٹ جلدی پہنچ سکتے تھے۔ 

ائر پورٹ سے نکل کر میں ٹیکسی کے لئے ادھر ادھر نظریں دوڑاتے ہوئے تصور میں ابا جی سے ہی باتیں کر رہا تھا اور یہ فیصلہ نہیں کر پا رہا تھا کہ بیس سال پہلے لگائی گئی شرط آج ابا جی کے مرنے کے دس سال بعد میں ان سے ہار گیا ہوں یا نہیں ۔

زندگی ، ریاضی اور "لا" کی قیمت۔

ہمارے خیال میں زندگی کے اکتالیسویں بیالیسویں برس یہ مان لینے میں کوئی حرج نہیں کہ ہمیں زندگی کی سمجھ نہ آ سکی۔ 

کم از کم اب تک تو بالکل کوئی بات پلے نہیں پڑی اب آگے کیا ہوتا ہے یہ وہی جانے جس نے یہ گورکھ دھندہ یا تانا بانا بُنا ہے۔ ہاتھی گزر گیا دم باقی رہ گئی اب اگر سمجھ آ بھی گئی تو دم کے بارے میں ہی آئے گی ہاتھی تو گیا۔

لیکن آپ کو یہ جان کر شاید حیرت ہو گی ہم اس ناسمجھی پر بہت خوش اور شکر گزار ہیں۔ اصل میں زندگی کے ساتھ ہمارا سمجھنے کا تعلق کچھ ایسا ہی رہا جیسا کہ پہلی دوسری جماعت سے لے کر میٹرک تک ریاضی کے مضمون کے ساتھ ہمارا رشتہ رہا، ریاضی کی سمجھ بھی ہمیں اٗس وقت آئی جب میٹرک کے بعد یہ غیر ضروری مضمون ہی نصاب سے نکال دیا گیا یا کم از کم اختیاری ہونے کی وجہ سے ہماری زندگی سے باہر نکل گیا۔ ریاضی میں بھی ہمیں اسی طرح کے مسائل کا سامنا رہتا تھا جسیے مسائل ہمیں زندگی میں درپیش رہے، مثال کے طور پر ہم نے اپنے ریاضی کے ماسٹر صاحب سے جب یہ سوال کیا کہ استاد جی آپ نے تختہ سیاہ پر یہ جو سوال لکھ کر حکم دیا ہے کہ معلوم کرو کہ یہ مساوات برابر ہے کہ نہیں، تو جب ہمیں معلوم ہی نہیں کہ یہ برابر ہے بھی یا نہیں تو ہم اسے مساوات کیوں کہہ رہے ہیں۔ آپ کا سوال تو یوں ہونا چاہیے کہ معلوم کرو کہ یہ مساوات ہے کہ عدم مساوات ماسٹر صاحب نے پہلے تو چند لمحے اپنے گریبان کی طرف کچھ غور کرنے کے انداز میں جھانکا یا شاید فقط دیکھنے پر ہی اکتفا کیا ہو اور اور پھر ہمیں ایک ہاتھ پر چار اور دوسرے پر تین چھڑیاں بڑے ظالمانہ انداز میں لگا کر کہا ، بیٹا یہ مساوات برابر نہیں ہے اور پھر دوسرے ہاتھ پر ایک اور چھڑی رسید کرتے ہوے بولے۔۔۔۔اےےے۔۔۔یہ لو اب یہ برابر ہو گئی۔

معمولات زندگی میں بھی اگر کبھی خدا سے کلام کرنے کا موقع ملا اور ہم نے از راہ اشتیاق ہی ہولے سے کہہ دیا کہ اللہ میاں کیا یہ بے انصافی نہیں ہے کہ ہم پڑھ پڑھ کر اور محنت کر کر کے بھی بیس ہزار کے ملازم اور ان پڑھ چوہدری صاحب کا جاہل بیٹا پٹواری بن کر ایک ہی سال میں کوٹھی اور پاجیرو کا مالک تو بالکل ریاضی کے ماسٹر صاحب کی طرح اللہ میاں نے اوپر نیچے پانچ سات لگائیں، مثال کے طور پر غیب سے لگی لگائی نوکری جانے کا امکان پیدا ہو جانا، ہنستے بستے گھر میں اچانک طلاق تک نوبت پہنچ جانا اور ہٹے کٹے وجود کو تین چار بیماریوں کا گھیر لینا اور پھر تھوڑا سا ٹھیک ٹھاک کر کے ہم سے شکرانے کے نوافل ادا کرا کے وہ ذات کریم بولی ، ہاں اب سناؤ مساوات ہے یا عدم مساوات۔

ہم جب پانچھویں جماعت میں پہنچے تو اچانک یہ الجبرا نام کا چھلاوہ ایک پورا دیو بن کر ہمارے سامنے آن کھڑا ہوا۔ نئے نئے ماسٹر جی تھے ہم بھی کچھ بڑے بڑے سے ہو رہے تھے بڑے پیار اور احترام آمیز سے جذبے سے بولے میرے بچو آج ہم ایک نئی طرح کا سوال حل کریں گے، تختہ سیاہ پر حروف اور ہندسوں کی ایک لمبی سطر لکھ کر بولے ، اس سوال میں ہمارا مقصد ہے "لا" کی قیمت معلوم کرنا ، ہم اسلامیات کی وجہ سے عربی میں کچھ بہتر تھے فورا بولے ماسٹر جی لا کا مطلب ہے نہیں۔ وہ ایک دم کچھ بولتے بولتے رہ گئے جیسے ہمارے ابا جی ہمیں موٹی سی گالی دینے سے پہلے کبھی کبھی رک جایا کرتے تھے، اور پھر کچھ توقف کر کے بولے بیٹا لا کا مطلب نہیں۔۔۔ لا کی قیمت معلوم کرنی ہے ۔ اب اس وقت ہم بیالیس برس کے ہوتے تو فورا کہہ دیتے ماسٹر جی یہ قیمت معاشی لحاظ سے معلوم کرنی ہے مذہبی لحاظ سے ادبی لحاظ سے یا عائلی ضابطوں کے اندر کیوںکہ بیوی کے سامنے لا کے معنی ہیں اس دن کا کھانا نہیں ملے گا، ملا جی کے سامنے لا کا مطلب ہے سیدھا جہنم میں ایک نقاد کے سامنے لا کا مطلب ہے کہ آپ کی ساری تخلیقات ثابت شدہ سرقہ ہیں لہٰذا آپ ایک تخلیق کار نہیں ایک گھسیارے ہیں اور دفتر میں باس کے سامنے لا کا مطلب ہے آپ نوکری سے یا کم از کم پروموشن سے فارغ۔۔۔ لیکن پانچویں جماعت میں بیالیس سال کا ذہن کچھ مناسب نہ لگتا سو شاید ہم خاموش ہی رہے تھے، لیکن ایک گھنٹے کا پیڑیڈ ختم ہونے کے قریب قریب ماسٹر صاحب نے پورا تختہ سیاہ سفید کرنے کے بعد بتایا کہ لا کی قیمت صفر ہے۔

حلفا کہتے ہیں کہ زندگی میں بھی یہی کچھ ہوا، شادی الجبرے ہی کی ایک ترقی یافتہ قسم ہوتی ہے، بہت سی باتیں نہ چاہتے ہوئے بھی جبراؑ قبول کرنا پڑتی ہیں اور بہت سی خواہشیں پوری نہ ہونے کے باوجود مساوات میں برابر دیکھانا پڑتی ہین۔ اور پھر شادی کے دس سال بعد لا کی قیمت صفر ہی نکلتی ہے۔ ہاں شادی کے الجبرے میں یہ فرق ہے کہ یہاں فقط لا کی نہیں بیگم کی ویلیو معلوم کرنا پڑتی ہے جو زمینی حقائق کے پیش نظر کبھی صفر نہیں آئی چاہئے ورنہ بیوی زیورات اور بچوں کو لے کر میکے چلی جاتی ہے اور آپ گھر کی مساوات کے دونوں طرف الو کی آنکھوں کی طرح صفر کی صورت مخبوط الحواس بیٹھے نظر آتے ہیں۔

ریاضی اور بالخصوص الجبرے میں ایک اور بڑی عجب شے تھی ، جس کا نام تھا " فرض کیا" ماسٹر صاحب جب ہمیں کہتے پیارے بچو فرض کیا لا کی قیمت ایک ہے تو ۔۔۔۔۔۔۔۔۔ ہمیں کبھی سمجھ نہ آئی کہ ہم فرض کر کے سوال کا جواب کیسے تلاش کر سکتے ہیں۔ لیکن جواب نکل آتا تھا ، اکثر وہی صفر یا زیرو۔۔۔۔۔ عملی زندگی خاص طور پر برادری اور حلقہ احباب کی ضرورت و اہمیت کے سلسلے میں ہمیں جب بھی کبھی نا سمجھی نے گھیرا تو یہ فرض کیا ہمارے بہت کام آیا۔۔۔ ماسٹر جی فرض کر کے مساوات کے تمام حروف و اعداد کو کاٹتے اور مٹاتے جاتے تھے اور آخر میں فقط ایک لا اور ایک اُس کی قدر و قیمت رہ جاتی تھی ، بڑے ہو کر برادری اور جان چھڑکنے والے احباب کے لئے بھی جب کبھی ہم نے فرض کیا کہ ہم پر کوئی مصیبت نازل ہو گئی ہے یا اپنے آپ کو انسان ثابت کرنے کے چکر میں فرض کیا ہم سے کوئی خطا سرزد ہو گئی تو کاٹنے اور مٹانے کی ضرورت ہی نہ پڑی زندگی کے تختہ سیاہ پر سے تمام رشتے اور تمام سہارے خود بخو د محو ہونے لگے اور آخر میں ایک ہم اور ایک ہماری قیمت یعنی صفر رہ گئے۔

ایک دن ہم سے ایک دہریہ کہنے لگا فرض کیا خدا نہیں ہے، ہم نے کہا اوہ اب کیا ہو گا اب تو کائنات رک جائے گی، لیکن قسم سے ایک لحظے کو نہ رکی ، بولا اب سب دعائیں بھول کر، بد دعائیں دینا چھوڑ کے با عمل ہو جاؤ کیونکہ رزق مقدر میں نہیں ہے کام کرو گے تو کھاؤ گے ، زندگی موت اللہ کے ہاتھ میں نہیں ہے کے چاہے گا تو مارے گا چاہے گا تو بچا لے گا بلکہ عقل سے کام لو اور خطرات و نقصان سے خود بچو اور فائدے اور صحت کو خود حاصل کرنے کے لئے ہاتھ پاؤں مارو، ہر نتیجے کو قیات تک نہ ٹالو اور اپنی ہر خباثت کا ذمہ دار شیطان کو سمجھنا چھوڑ دو بلکہ اسی دنیا میں اعمال کے نتائج سوچ سمجھ کر ان پر عمل پیرا ہونا شروع کر دو۔۔۔۔یقین مانیے اگر ہم کچھ دیر یہ فرض کیئے رہتے تو پتہ نہیں ہم کہاں سے کہاں پہنچ جاتے لیکن ہم فورا بھانپ گئے کے کم بخت ہمیں بھی راہ راست سے ہٹا کر جہنمی کرنا چاہتا ہے لہٰذا فورا ہی تائب ہوئے اور اگلے ہی لمحے اپنا سب کچھ پھر اللہ اور شیطان پر ڈال دیا۔ 

ذات برادری اور فرد و معاشرے جیسے چھوٹےچھوٹے سوالوں سے نکل کر جب ہم مجموعی طور پر کائنات مذہب تاریخ اور حیات کے بڑے امتحانی سوالوں سے روشناس ہوئے تو ضرورت محسوس ہوئی کہ اب ہماری پرائمری کی ریاضی سے کام نہیں چلے گا ، اب چونکہ سوال زیادہ لایعنی اور مضحکہ خیز ہیں اس لئے ریاضی کا بھی کوئ بڑا چغد ہونا چاہئے جس کی مشقوں اور سوالات سے ہمیں شاید کچھ کمک پہنچ سکے، خدا بھلا کرے چغد اعظم فیثا غورث کا کہ جس نے ہم سے بہت پہلے کہہ دیا تھا کہ ساری کائنات اور یہ رنگ و بو کا سارا تانا بانا ہندسوں کا کھیل ہے اور کچھ نہیں ہے اور اس کا حاصل فقط ایک صفر ہی آتا ہے ہم بحثیت ایک کٹر "مسلمان" کچھ تذبذب کا شکار تھے کہ دور جاہلیت کے ایک منکر و مشرک کے جوابوں سے مدد لیں یا نہ لیں کہ ایک اللہ لوگ نے بتایا کہ فیثا غورث درست کہتا ہے، لا موجود ال اللہ۔۔۔۔۔اب آپ ہی بتائے کہ ہم شکر ادا نہ کرتے تو اور کیا کرتے کہ ہماری نا سمجھی کا بھرم رہ گیا اور ہم یہ جان گئے کہ جس شے کی ہمیں سمجھ نہ آئی وہ خیر سے ہے ہی نہیں۔ 

غلط فہمی۔

میں آپ لوگوں کو بتا رہا ہوں کہ یہ سارا فساد یہ سب خرابی اِس اسلام کی وجہ سے ہے

اس سے جان چھڑا لو، اسے اپنے بیچ میں سے نکال پھینکو تو امن ہو جائے گا ، سب مسائل سے جان چھوٹ جائے گی۔

توبہ توبہ، اللہ کا نام لو عارف ، توبہ کرو ،کیسا کفر بک رہے ہو

عبداللہ دوکاندار اپنے دونوں کانوں کو پکڑ کر باقائدہ کھینچتے ہوئے بولا وہ توبہ کرتے ہوئے ہمیشہ کانوںکے ساتھ ناک کو بھی پکڑا کرتا تھا لیکن اسے یاد تھا کہ محلے داروں کے دکان پر اکھٹے ہونے سے کچھ ہی دیر پہلے اُس نے سو روپے پاؤ اور پچاس روپے پاؤ والی مرچوں کو ملا کر نئی تھیلی تیار کی تھی اس لئے ناک کو ہاتھ لگاتے ہی اُسے چھینکیں شروع ہو جائیں گی لہٰذا اس نے ناک چھونے کی عادت کانوں کو قدرے زیادہ کھینچ کر ہی پوری کر لی۔

جب سے چاچا اللہ دتہ فوت ہوا تھا بڑے حاجی صاحب نے چاچے کی بیوہ چاچی حمیداں کے لئے زکوۃ کا دو ہزار مقرر کر دیا تھا جو وہ ہر مہینے باقائدگی سے عبداللے کے دکان پر دے جایا کرتے، دکان پر اس لئے کہ گواہان کی موجودگی کی سند رہے اور "بوقت ضرورت" کام آئے۔

چاچی حمیداں جو زکوۃ کے پیسے پتہ کرنے دکان پر ائی تھی نے عارف کی بات سن کر اپنی میلی چادر پوری طرح کانوں ، منہ اور ناک کے گرد لپیٹ لی جیسے عارف کی بات سے بُو آ رہی تھی۔ چاچے کے مرنے اور حاجی صاحب کی طرف سے پیسوں کا انتظام کرنے کے بعد اُسے دین کی اتنی تو سمجھ آ گئی تھی کہ اس طرح کی بات کرنے والا ہر بندہ دوزخ میں جائے گا۔

بوڑھا بابا غلام نبی اینٹوں کی چوکی پر پڑی پرانی اخبار پر بیٹھا بیٹھا عارف کو ایسے سہم کر دیکھنے لگا جیسے اُس نے ایک دن اپنے صحن کے وسط میں پڑے ہوئے اُس خط کو دیکھا تھا جو اُس کی بیٹی گھر سے بھاگنے سے پہلے چھوڑ گئی تھی۔

حمید گجر عرف میدا پہلوان احاطے کی اس پرانی دکان کے سامنے پڑی ڈھیلی چارپائی کے درمیان سے کھسک کر کنارے پر آگیا تھا اور اپنی ران پر ہاتھ رکھے ہوئے سر کو جھکا کر یوں خونی نظروںسے عارف کو دیکھنے لگا جیسے بیل سرخ کپڑے کو دیکھتا ہے۔ وہ بس اس انتظار میں تھا کہ عارف ایک بات اور کرے تا کہ اُسے یقین آ جائے کہ جو کچھ اس نے سنا ہے صحیح سنا ہے تو وہ جھپٹ کر عارف کو ٹانگوں سے اٹھائے اور روڑی والی زمین پر پٹخ کر ٹھنڈا کر دے

ملک سیاسی بندہ تھا وہ جذبات سے نہیں گہری سوچ بچار سے کام لینے کا عادی تھا،

پرانی کرسی پر بیٹھے بیٹھے مونچھوں کو تاؤ دیتا ہوا کسی گہری سوچ میں سے نکل کر بولا

اوئے عارفے تمھیں پتہ ہے تو کیا کہہ گیا ہے اور اس کا کیا نتیجہ نکل سکتا ہے

ملک کی بات سُن کر بابے غلام نبی کی ڈھارس بندھی تو وہ بھی بولا

بیٹا کیا تمھاری نظر میں بزرگوں کی یہ عزت یہ مقام رہ گیا ہے

عارف حیرت زدہ ہو کر سوچ میں پڑتے ہوئے بولا ۔۔۔۔ بزرگ ۔۔۔ 

اور پھر کچھ سمجھتے ہوئے اچھل کر بولا

او نہیں چاچا ۔۔۔اللہ والَیو۔۔۔۔ مجھے تو یاد بھی نہ تھا کہ تایے دینو کا بھی پورا نام اسلام دین ہے

وہ تو ہمارے سر کے صاحب ہیں ہمارے لئے رحمت کا باعث ہیں

میں تو اس اٹھائی گیرے اُس خبیث اسلام کی بات کر رہا تھا جو ہمارے محلے میں نیا آیا ہے اور

جس کی وجہ سے آئے روز جھگڑا فساد ہو رہا ہے۔